中國女足強陣搶頭胡

猪拉多纳

南韓缺雙箭惡唔出樣

東亞錦標賽今晚開波，呢項賽事分成男子及女子組，今屆喺中國武漢舉行，女足率先登場，北韓女足對日本女足、中國女足對南韓女足。「中女」身為東道主，主帥郝偉召集精銳，23人大軍名單，19人有份協助球隊打入6月女子世盃8強。反觀，南韓女足缺少効力車路士嘅射手池笑然及「男兒」前鋒朴恩善，級數大為下降，一於捧中國女足主勝。（now 633周六晚9時直播）

相比6月女子世盃名單，主帥郝偉只作出4個人選更換，許燕露、馬君、張睿、趙麗娜今次落選，但佢哋並非主力，新入選嘅劉俊、楊麗、王詩朦、高崎屬於老將，郝偉明顯想為呢支年輕球隊注入經驗。最重要係王麗思同王珊珊仍在陣，兩人喺女子世盃共轟入4球，成為球隊打入8強嘅功臣，更何況現時有地利，預料會有更佳發揮。

世盃16強分子南韓女足，似乎輕視東亞錦標賽，並冇徵召池笑然同朴恩善，尤其係缺少上季「英格蘭球員小姐」池笑然，唔止大大削弱鋒線力量，更加係冇咗一位精神領袖，難免影響軍心。再睇埋兩隊近5次交鋒，中國女足取得3勝1和1負，值得向「中女」投下信心一票。
北韓夠young「細」頂日本

另一場，北韓女足今次只提交21人名單，其中19人係「90後」，非常年輕，但唔可以忽視其「精神力量」，上屆獲國家領導人金正恩打氣下，爆冷捧盃。至於日本女足只召入4位有份參加6月世盃嘅球員，清一色全部球員効力本土聯賽球隊，質素唔可以同奪得世盃亞軍嘅陣容相提並論，今仗屬於五五波，揀入球細。

（now 633周六晚6時20分直播）