銀河 FC中央駁火做大騷

猪拉多纳

洛杉磯銀河引入中場謝拉特之後，隨即成為球迷焦點，由佢拍住愈老愈可愛嘅前鋒羅比堅尼攻堅，火力真係非同小可。聽朝銀河喺主場迎戰中冠盃D組對手、嚟自千里達嘅FC中央，肯定有殺無賠，1.43倍入球大咪嫌熱。（開賽時間：周五早上10:00）

隨住羅比堅尼同謝拉特傷勢好轉，呢對「英超孖寶」上仗協助球隊作客勇挫科羅拉多急流3:1重響勝鼓，當中羅比堅尼更喺完場前入波，狀態完全返晒嚟，呢鋪回師主場，梗係想入多兩粒將主場連勝紀錄改寫到7場啦！之不過門將彭尼度離隊，副選門將白賴仁柏克仲抖緊，焗住起用近日先歸隊嘅當路雲歷格斯把關，怕且銀河都幾難淨勝對手。

至於FC中央雖然係喺3年前先至成立，不過陣中球員來頭都唔嘢小，好似前鋒韋利斯柏拉沙、中場艾度拿古亞拉、門將真威廉斯，齊齊有份入選千里達嘅美洲金盃名單，呢鋪對住連續6場比賽都失守嘅銀河防線，想偷雞入番粒攞個安慰獎唔過分啫！