藍戰士細歎天鵝肉

猪拉多纳

英超衞冕冠軍車路士喺新球季雖然被視為奪標大熱，不過佢哋踢季前熱身賽冇乜霸氣囉，最可靠嘅箭頭迪亞高哥斯達又受大腿傷患困擾，今場主場對「天鵝」史雲斯嘅開鑼戰都唔知出唔出得。車仔無論係靠「病虎」法卡奧定係冇態嘅雷米，一樣信唔過，今場都係捧入球細穩陣！（now 621周日凌晨零時30分直播）

無疑車路士嘅陣容的確夠晒黃金，但班波喺今夏熱身賽總係踢極唔起，輸畀紐約紅牛2比4可以話係大意，但畀阿仙奴打破不勝魔咒，再喺日前不敵費倫天拿0比1，隊波嘅攻力同狀態就真係令人擔心！上季車仔喺首循環對史雲斯夠晒勁，落後一球之下反勝4比2，皆因當時車仔鋒霸「迪哥」仲健健康康，佢喺該仗大演帽子戲法，令球迷唔再恥笑車仔係前鋒墳墓。不過「迪哥」今場因傷上陣成疑，法卡奧表現又持續低迷，雷米更加未夠卡士獨挑大樑，車仔今場想炒多「天鵝」一鋪？難啲囉！
史雲斯作客守行先

史雲斯雖然崇尚控球在腳嘅華麗踢法，但上季兩度畀車路士大炒，你估見過鬼仲唔怕黑咩，預料史雲斯今場會以守行先，加上新簽入嘅阿休同艾達盧比斯兩位前鋒質素一般，仲要時間適應英超比賽節奏，今場都係捧入球細好啲。