巴塞點秤都贏西維爾

猪拉多纳

今晚喺格魯吉亞中立場舉行嘅歐洲超級盃爆發「西甲內訌」，由上屆歐聯盟主巴塞隆拿硬撼上屆歐霸盃2連冠嘅西維爾，今仗或會成為「地上最強」核心恩尼斯達同美斯嘅里程碑，如順利贏盃，呢對正副隊長便會取得喺巴塞嘅第25座獎盃，拍住啱啱離隊嘅傳奇球星沙維並列球隊捧盃王，所以巴塞必會全力爭冠，絕冇揸流攤，以其超班實力，加上美斯係西維爾主帥艾美利嘅剋星，可以話係楂住盃耳嚟踢，直取巴塞讓球主勝。

(有線61、64、201及203台周三凌晨2時45分直播)
小白首任正隊長唔衰得

雖然巴塞球王美斯歸隊冇耐，但上周同羅馬「拍跳」已見佢狀態唔錯，賽後同對方「王子」托迪交換波衫時大騷腹肌，有網民話直情拍得住死敵C朗添，難怪隊友拿傑迪錫都即刻賣口乖，話只要美斯心情靚同托弗，巴塞可以贏晒所有錦標。當然美斯亦有足夠動力，話說佢同老死「小白」恩尼斯達，同樣喺巴塞生涯累積24項冠軍，只要今仗擊敗西維爾，便可追平啱啱離隊嘅傳奇球星沙維嘅紀錄，並列喺「地上最強」捧盃最多嘅球員，而且今仗係「小白」第550場為巴塞披甲，將位列隊史第3位，呢位中場大將喺榮升正隊長後嘅首場正式比賽，梗係唔衰得啦！

西維爾能連捧兩屆歐霸盃絕對唔簡單，不過拍埋西甲一哥度肯定處於下風，記得上屆佢哋喺歐超盃淨吞皇馬兩蛋，今年面對實力更強嘅巴塞必定更加難打，加上佢哋有卡路士巴卡、麥比亞、阿歷斯維度、阿利巴斯等主力離隊，就算補入高路比恩卡、尼桑斯同恩莫比尼等實力派，但仍需時間磨合。
艾美利遇美斯即腳軟

睇番美斯之前曾18次出戰西軍主帥艾美利帶領嘅球隊，當中12場有士哥之餘，佢總共轟入22粒嘅數字亦極誇張，而且艾帥無論執教艾美利亞、華倫西亞、莫斯科斯巴達同西維爾，對上19次對巴塞只錄得6和13負，因此佢只要見到美斯同巴塞都例必腳軟。

2006年「小白」同年僅19歲嘅美斯，曾喺歐超盃慘吞西維爾3蛋，如今喺同一盃賽狹路相逢，誓要大勝報番一箭之仇，讓球主勝不容錯過。值得一提今仗如法定時間賽和將要加時，再和則以互射12碼決定獎盃誰屬。