巴塞包做大騷

猪拉多纳

啱啱捧走歐超盃嘅巴塞隆拿，話咁快今晚就喺西班牙超級盃首回合作客畢爾包，向六冠王之路嘅第五冠進發，雖然球王美斯極速上力，但「地上最強」嘅防線甩漏多多堅牙煙，撞正為應付歐霸盃外圍賽早已開操嘅畢爾包，隨時合演入球騷，大盤乃不二之選。

（now 632周六凌晨4時直播）

象徵新季揭幕嘅西班牙超級盃今晚開打，由上季聯賽盟主鬥盃賽冠軍，由於巴塞上季包辦呢兩項錦標，因此今季另一參賽資格由西盃亞軍畢爾包頂上，4日內會進行主、客兩回合賽事，決定獎盃誰屬。巴塞剛喺周三凌晨嘅歐洲超級盃對西維爾，球王美斯開波冇耐便轟入兩個靚罰球，睇得出呢位射手弗到漏油，就算尼馬因腮腺炎要抖兩周，以美斯夥拍蘇亞雷斯依然火力十足。可惜佢哋喺領先4比1大好形勢下，竟然畀鬥志可嘉嘅西維爾追成平手，要踢到加時靠後備殺手柏度洛迪古斯建奇功先贏5比4，一來有輕敵之嫌，二來後衞防守死球同高空波嘅老問題仍未解決，每逢對方「空襲」都騰騰震。
球員上力 畢爾包搶韁

連同西盃決賽，畢爾包上季三鬥巴塞俱告落敗，而且每次淨輸兩球或以上，擺明畀「地上最強」剋住。畢爾包今場唯一比巴塞佔優嘅地方，可能係比賽狀態稍佳，球隊為應付歐霸盃外圍賽早於7月初開操，經過兩場歐霸盃正式比賽後，球員已經入晒局。而且巴塞喺歐超盃踢到加時先贏波，體力輸蝕，預計「巴斯克雄獅」會藉地利一開波就搶攻。不過巴塞為爭取今年第5座獎盃必定搏甩髀，明知後防不穩，索性以攻代守都唔奇，癲鳳鬥狂龍下入波唔會少，大盤真係有買趁早。