普魯士打吡多蒙特做大騷

猪拉多纳

慕遜加柏牛奶仔中堅初合作

首輪德甲重頭戲係普魯士打吡，多蒙特主場迎戰慕遜加柏，係雙方近47年來首度喺德甲第一輪交鋒，雙方今季調整陣容後，中前場實力同狀態都處於高峰，不過防線同樣唔齊人，當中慕遜加柏一對「牛奶仔」中堅首度合作，默契成疑，大家攻優於守下，大盤係投X首選。

（now 670、有線61及201台周日凌晨零時30分直播）

多蒙特同慕遜加柏埋門狀態都起得甚急，多蒙特喺歐霸盃同德國盃先後三戰愈贏愈易，慕遜加柏亦喺德國盃大比數反勝對手過關。多蒙特今季由新帥杜曹領軍，佢上任後首先激活有「阿美尼亞施丹」稱號嘅中場米希達利恩，呢位好波之人過去兩季表現未如人意，但換帥後好似變咗另一個人，除咗盤傳射表現都脫胎換骨外，歐霸盃次回合對禾夫斯貝加更加連中三元。多蒙特今季增兵唔多，但由利華古遜加盟嘅卡斯特羅攻守兼備，配合回復健康嘅靈魂人物馬高列奧斯同根度簡，個個都咁有創造力，搞到香川真司同超新星莊拿斯荷夫曼今場都要先做後備，前線奧巴美揚續約後亦狀態大勇，今晚喺全場爆滿嘅西法倫球場出師，當然開波即攻。
22倍「客主」值得小試

慕遜加柏喺德國盃反勝聖保利一役同樣精彩，新加盟嘅前漢諾威隊長史甸度梅開二度，配合靴爾文同拉菲爾基達奴，加上另一新兵瑞士國腳箭頭祖斯比迪米斯，有條件同多蒙特對攻。不過今場雙方防線都唔齊人，多蒙特守將艾歷杜姆、蘇保迪同基治都因傷缺陣，慕遜加柏中堅艾華路杜明基斯同史蘭斯亦因傷倦勤，另一中路守將洛特維迪停賽，今場作客多蒙特，要起用剛提升甲組隊嘅20歲新丁馬雲舒侯斯，同新加盟嘅19歲車路士借將安達斯基斯甸臣合作雙中堅，肯定面臨重大考驗，今場預期入波唔會少。值得一提係多蒙特史上曾經八次喺落後下反勝慕遜加柏，半全場「客主」有22倍亦值得小注一試。