凱沙蠱惑盤又嚟料

猪拉多纳

評級偏低易搵食

隨住歐洲各大聯賽相繼開鑼，投X氣氛亦愈來愈熱鬧，始終大家玩慣玩熟，之前嘅美洲國家盃、美洲金盃等難以相提並論。不過大戶上季輸得慘烈後，新球季變得小心翼翼，甚少喺賽前露手影。今日當大家注意力集中晒喺英超曼城大戰車路士，肥叔就推介一場德乙賽事，由柏林聯主場對凱沙羅頓，後者近況平平仲要讓波，逆思考吼實呢隻德國「紅魔」。（周日晚7時30分開賽）

凱沙羅頓曾喺97至98年度球季一升班即勇奪德甲冠軍，成為歐洲球壇一時佳話，雖然佢哋同拜仁慕尼黑、多蒙特等班霸差天共地，但整體實力唔差，而且唔會好似拜仁咁讓波讓得過晒火位，評級偏低自然容易搵食。凱沙自2012年降落德乙後，每季都成為升班熱門，可惜近3季唔係「梗頸四」，就係於升班附加賽飲恨，總係同德甲擦身而過，尤其係上季季尾忽然跌Watt，將第3位拱手讓畀卡爾斯魯厄，蠱惑味甚濃。

經過近3季觀察，肥叔將凱沙定為「德乙中上、德甲未滿」之列，球隊滿足於德乙做勁旅，又唔想為升德甲使太多錢，對住呢類蠱惑波，不妨奉行「季初捧、季尾反」策略。睇番凱沙之前兩場冇波入之餘，上仗德國盃對住低組別球隊羅斯托克，要搞到互射12碼先晉級，點解今晚喺聯賽作客柏林聯仲要讓平半呢？肥叔聽班行家講，話莊家似係收到風凱沙今場會嚟料，特登搭定個棚氹人買下盤，睇番往績凱沙近5交手未輸過，況且柏林聯亦唔係乜嘢好貨色，肥叔認為以半個盤博一個盤值博，不妨入定少少上盤。
禾堡讓得辣玩入球大好過

至於德甲禾夫斯堡主場對法蘭克福，禾堡雖貴為上季「二哥」，但讓到球半咁多實在捧唔落手，始終季初狀態係點要踢過先知，況且兩軍都係進攻大過天，預計會合演入球騷，簡簡單單捧大盤。（now 670、有線61、64、201及203台周日晚9時30分直播)