撐紅軍主主

猪拉多纳

羅渣士再做懦夫剋星

利物浦今晚喺英超主場對般尼茅夫，一於揀「紅軍」2倍「主主」，因為佢哋喺開咧戰贏波後，領隊羅渣士被炒賠率已即時降溫，連主席都開聲撐佢，相信羅帥領軍會更得心應手，尤其般尼茅夫連續兩次喺盃賽被利物浦玩殘，欺善怕惡嘅羅渣士，對付懦「夫」有一手，撐利物浦啱晒數。（now621台周二凌晨3:00直播）

上星期利物浦作客以1:0砌低史篤城，要到完場先至靠菲臘比古天奴射入靚波全取3分，過程係就係肉酸啲，但考慮到「紅軍」喺上季煞科日作客以1:6慘負對手，贏波都總算係乜仇都報晒，收貨啦！仲有呀，開季前羅渣士被菠菜公司列為今季英超最快炒魷領隊大熱門，只得6倍，隨住「紅軍」首戰贏波，賠率已下調至11倍，可見莊家都睇好羅帥可以保住個飯碗。
利物浦主席開腔撐羅帥

事實上，利物浦主席湯韋拿都已經開到聲，話確信羅渣士係帶領「紅軍」改革嘅最理想人選，而且高層用實際行動代替齋噏，全力支持佢收購皇家馬德里嘅中場伊拿拉文迪，希望悍將盧卡斯一旦離隊後，中場依然有足夠人腳可以調動。難得高層咁信任自己，羅渣士又點可以唔落柯打添食呀？
般尼茅夫對賽坐底輸2粒

再講，呢件羅渣士堪稱係「懦夫剋星」，佢冇嘢叻，最叻就係欺善怕惡！對家般尼茅夫以英冠冠軍身份升班，佢哋喺開咧戰主場即以0:1不敵阿士東維拉都算，至弊係「懦夫」對上兩次喺盃賽遇到「紅軍」，鋪鋪都坐底輸2粒，而且都係由半場輸到落尾，擺明畀羅渣士食住。加上般尼茅夫啲新球員，大部分得英冠級數，最有卡士得來自聖伊天嘅麥斯格拉度，呢鋪由頭輸到尾，又有乜出奇先？