紅魔就係等呢日

猪拉多纳

歐洲聯賽冠軍盃今晚爆發附加賽首回合！英超風頭躉曼聯隆重登場，喺奧脫福主場迎戰比利時勁旅布魯日。今屆歐聯繼續加碼，總獎金高達12.5億歐元（約108億港元），「紅魔」今季狂花8,000萬鎊（約10億港元）增兵，目的就係再次進入呢個「百億金庫」搵銀，因此佢哋對晉級主賽圈係志在必得，遇上只屬歐霸貨色嘅布魯日，為免夜長夢多，必先借地利大勝一場，讓球主勝咪走寶。（有線61及201台周三凌晨2時45分直播）
布魯日未夠級數

曼聯上季在名帥尹戈爾帶領下，幾經辛苦殺上聯賽第4位，獲今屆歐聯附加賽參賽資格，當然闖入分組賽先至最重要，因歐洲足協加碼，今屆歐聯總獎金高達12.5億歐元，單計殺入分組賽便穩袋1,400萬歐元（約1.2億港元），仲未計喺分組賽每場贏波或和波獎金同電視轉播收入，難怪曼聯今夏瘋狂入貨。引入嘅強援迪比、舒韋恩史迪加同舒尼達連等件件貴嘢，目的正係要喺呢個「金庫」分一杯羹。紅魔開咧兩場聯賽贏晒兼一球不失，睇番上仗作客小勝維拉一粒，尹戈爾唔單止出奇地讓非主力贊奴沙打正選，而且早早領先後眾將都勒住踢，明顯係為呢場歐聯附留力。

布魯日上圈反勝希臘彭拿典奈高斯，不過這支比利時勁旅實力有限，打歐霸還可以，去到歐聯級數難免力有不逮，上屆歐霸8強遭烏克蘭球隊迪尼普淘汰便可見一斑，今次附加賽首回合作客明顯高幾班嘅曼聯，隨時未踢已腳軟。
朗尼嚟料搶士哥

此外，曼聯隊長朗尼作為中鋒表現麻麻，上仗對維拉更錄得零射門嘅尷尬數據，表現絕對唔合格，不過尹戈爾力撐「魔童」今季可入20粒，難得撞正實力平平嘅布魯日，呢位隊長係時候用入波證明自己，何況紅魔對上3次於分組賽前一圈（當時仲係第3圈，並非叫附加賽）均順利過關，並3度喺主場均能大炒對手，斯維認為讓球主勝係不二之選。