米堡追殺打比郡

猪拉多纳

西班牙化有料到

英冠開鑼冇耐，本周中就要開快車，重心推介打比郡主場對米杜士堡，客勝可取。米堡上季同升班資格擦身而過，今季捲土重來，氣勢依然強勁，球隊近年實行「西班牙化」，踢法悅目之餘亦夠實際，上仗大炒保頓3蛋，盡顯霸氣。主隊打比郡患上「季初病」，開季3戰未贏過，狀態不足之下，難以抵擋對手強攻。

（周三凌晨2時45分開賽）

米杜士堡兩年前聘請前皇馬助教卡蘭卡執教，推行「西班牙化」，先後簽入3位西班牙「鬥牛士」，效果立竿見影，上季更打入升班附加賽決賽，可惜最終不敵諾域治，未能重返英超。不過球隊根基並冇受動搖，一班西班牙兵演出仍佳，前鋒安歷基傑基上仗更加梅開二度，腳風相當順。除咗原有人腳外，卡蘭卡今季亦簽入前英格蘭國腳達寧、意大利前鋒迪亞高法比尼及李斯特城射手紐根特等，中前場人腳鼎盛，更有本錢踢進攻足球，作客都唔會赦打比郡。
近3次交手米堡全勝

反觀，打比郡雖然正式買斷兩位借將湯馬士恩斯及戴倫賓特，但呢兩位前鋒季初交唔出貨，後者更因為缺態，上仗被貶為後備。事實上，打比郡整體表現亦差，開季3場比賽未贏過，最離譜係英聯盃輸畀英乙球隊樸茨茅夫，試問又點同米堡鬥。另外，雙方近3次交手，米杜士堡取得全勝，兼夾保持不失波，無論狀態及往績都佔上風，3分應該可以手到拿來。
白禮頓夠野心要追捧

同時間開波另一場英冠賽事，白禮頓係今季唯一聯賽兩戰全勝嘅球隊，表現令人驚喜，會方早前簽入英格蘭射手森莫亞，野心十足，想有一番作為，今仗作客對仍未開齋嘅哈特斯菲爾德，一於再追白禮頓贏波。