機員火力猛攻陷紐約城

猪拉多纳

美職聽朝有好戲上演，由東岸火力王哥倫布機員，坐鎮主場恭候星光熠熠嘅紐約城。雖然紐約城上仗反彈贏波，之不過呢班波作客表現麻麻，今次造訪機員都係信唔過，1.67倍主W手到拿來。（TVB301周四早上7:30直播）
射手基卡馬拉嚟料

機員踢法向來進取，目前佢哋以38個聯賽入球，同紐約紅牛並列東岸入球最多隊伍，當中射手基卡馬拉近期更加着晒火，5戰夾埋轟入5粒，聽朝對住紐約城條鬆散防線隨時又開餐。況且美職已經踢咗超過一半賽事，唔少球隊都呈現疲態，好在機員距離上一場足足有11日休息時間，抖足精神預料今戰表現自然加倍醒神。

另邊廂嘅紐約城，上仗反勝華盛頓聯隊3:1，總算中止兩連敗，但想博佢哋繼續發威睇怕唔係咁易，事關班波今季聯賽作客11戰，夾埋先入得9粒，就算近排有派路同林柏特兩位國腳級球員幫手，表現仍然冇起色，對上兩仗作客同樣輸波兼食白果。呢次作客硬撼近5次主場出擊錄得3勝2和嘅機員，怕且都要放低3分先畀走。