修咸頓追殺米迪蘭特

猪拉多纳

柏利踢歐霸盃勁Sharp醒

今晚上演歐霸盃附加賽首回合賽事，修咸頓主場迎戰丹麥球隊米迪蘭特。「聖人」喺英超表現唔多掂，不過主帥朗奴高文唔卸責之餘，仲拍心口話會改善問題，加上射手加斯安奴柏利今屆踢歐霸盃零舍醒神，呢次「聖人」對住疲兵米迪蘭特，一於撐1.9倍「讓主」，博佢哋強勢反彈。（開賽時間：周五凌晨3:00）

修咸頓上仗輸畀愛華頓0:3，話冇顧忌呢場歐霸盃比賽大家都唔信啦。賽後領隊朗奴高文強調會加強後防之間嘅溝通，呢種務實態度，肯定可以改善防守不穩嘅問題。同時，佢亦表明唔會賣走主力兼隊長荷西方迪，連軍心都穩定埋，難怪射手沙恩朗都話今仗誓要贏波，食住個勢反彈。
米迪蘭特5星期踢10場波

雖然新兵中場佐迪卡斯受傷，好在朗奴高文早前斟掂車路士中場奧里奧爾羅美奧過檔，確保組織力唔受影響，更何況，射手加斯安奴柏利今屆踢歐霸盃特別Sharp醒，對上一圈兩鬥維迪斯都有波入，呢鋪有齊隊友杜辛泰迪治、沙恩朗支援，夠晒彈藥射爆對方大門啦！

貴為上季丹超冠軍，米迪蘭特起初諗住可以殺入歐聯分組賽，同巴塞、拜仁等豪門交手，點知去到歐聯第3圈外圍賽，就因為輸作客入球被尼科西亞踢出局，降格踢歐霸盃，嚴重打擊士氣。最重要一點，今場波係米迪蘭特5個星期以嚟嘅第10場比賽，佢哋上仗又要同丹超勁旅哥本哈根鬥足90分鐘，成隊波踢到殘晒，今鋪仲點可能爆得出先？