畢爾包弗到震 讓客有「利」可圖

猪拉多纳

新鮮出爐西超盃冠軍畢爾包，周五凌晨會喺歐霸盃附加賽首回合再度出擊，造訪斯洛伐克球隊斯利納。客軍教練華爾韋迪自爆已做足資料搜集，相信以阿度里斯為首嘅鋒線，可望輕鬆大勝一場攞頭威，2.8倍「讓球客勝」值博。（開賽時間：周五凌晨2:15）
斯利納實力見底

畢爾包喺西甲開咧前好威水，西超盃兩回合計竟然大炒「地上最強」巴塞隆拿5:1！球隊晨早已經進入作戰狀態，捧埋盃更加係信心爆棚。呢支巴斯克球隊新季未有大手收購，慶幸伊度拉斯比、迪馬高斯及阿度里斯等骨幹仍然在陣，戰鬥力足以在西甲左右大局，區區一隊斯利納點會係畢爾包對手？

不過，畢爾包主帥華爾韋迪賽前呼籲一班球員唔好輕敵，仲安排教練團打探斯利納虛實，大讚呢支上季斯洛伐克聯賽「二哥」火力一流，特別制訂一套戰術為今戰做足準備。斯利納星味欠奉，喺歐霸盃第3圈外圍賽更幾乎出局，憑巴西前鋒韋利安喺加時尾段入波，先至驚險淘汰烏克蘭隊伍禾斯克拉晉級，戰鬥力似乎見底。況且斯利納深明次回合造訪畢爾包地頭凶多吉少，首回合惟有靠地利搶攻，隨時令擅打反擊的畢爾包「搵到食」。