哈化不來梅細均力敵

猪拉多纳

德甲獨腳戲哈化柏林主場對雲達不來梅，兩軍實力接近，質素唔高但勝在兩個教頭都得到球員絕對信任，雙方都拚勁十足，但亦同時面對鋒力不足問題，預期係一場拉鋸戰，投X首選細盤，求好分可以敲埋和局。

（now 670、有線61及201台周六凌晨2時30分直播）

兩支近年跌晒Watt嘅老牌球隊上季情況都好相似，開季成績極曳，但先後用番自己名宿做救火教練，結果雙雙護級成功，哈化教練達戴爾上季季中後至接手，強調紀律同防守，結果上季佢帶嘅最後16場聯賽開出12場細盤，細盤率達75%，今季德國盃同聯賽首戰都係開細。球隊上輪作客劣勢下靠反擊贏欠態嘅奧格斯堡，但陣中攻擊主力賓哈迪拉、舒希巴同艾拉基養傷，翼鋒比倫斯停賽，今晚主場都冇強攻本錢。

不來梅上季亦靠名宿史基尼克救火成功，佢喺不來梅負責青訓工作多年，深得球員支持，但球隊目前質素平庸，今夏三大箭頭戴菲沙爾基、尼斯彼德臣同迪山度先後離隊，新加盟前鋒仲未證明到能力，球隊上仗主場對史浩克搏盡都吞三蛋，今仗對手實力雖然減弱，但大敗過後相信作客都唔會冒險搶攻。