Down Grade馬拉加難靠

猪拉多纳

以前威過 依家坎坷

隨住歐洲主流聯賽陸續重開，西甲今晚亦上演開鑼戰，由馬拉加主場對西維爾打頭陣。馬拉加早年曾經被卡塔爾皇室收購，一度瘋狂招攬球星風光無限，點知班波得嗰一剎那光輝，近年頹到keep住賣人維持生計，今季增兵仲衰到向次級聯賽埋手，叫人點對佢哋有信心先？班波今晚對住上季殺雙自己嘅西維爾，睇怕幾難有運行，客勝有2倍唔使猶豫。

（now632台周六凌晨2:30直播）

馬拉加喺2010年被卡塔爾皇室阿勒薩尼家族收購，之後球隊大事招兵買馬，前鋒雲尼斯達萊、中場辛迪卡索拉、祖亞昆、巴迪斯達等一級球星來投，的確星味十足，球隊亦隨即升格為西甲一路奇兵，2年前更如願殺入歐聯淘汰賽。
賣人套現解決財困

勢估唔到馬拉加轉個頭就話財困，近年要不斷賣人套現之餘，又試過衰到被禁踢歐洲賽1年，結果班波逐漸沉淪，上季尾5場波更輸足4場收咧。睇番佢哋今季個陣容，鋒將祖安美、森姆加西亞等人離隊唔在講，最弊係啲新兵堅唔似樣。除咗買斷借將岩拉伯特、簽入切爾達射手查里斯叫好啲外，馬拉加竟然向次級聯賽埋手，包括引入意乙卡利亞里前鋒確比、荷乙NAC翼鋒泰亞杜尼、英冠打比郡中堅艾賓度沙，咁嘅貨色唔係幫到手呀，話得都冇人信喇！主力中場列斯奧、中堅維列頓今仗仲話唔踢得，好難搞啫。
西維爾新援夠卡士

另邊廂嘅西維爾雖然放走前鋒卡路士巴卡、伊亞高艾斯巴斯等人，但就換嚟前鋒恩莫比尼、翼鋒高路比恩卡、中場尼桑斯、鐵衞阿爾拉米等人，級數擺明比馬拉加高幾班。

何況班波鬥心爆晒棚，佢哋早前喺歐洲超級盃一度落後巴塞1:4，都可以連追3球逼和對手踢加時，即使最終都係輸波收場，但只要佢哋踢番呢場波嘅水準，馬拉加班蝦兵蟹將點頂得住！