熱刺李城搶W大作戰

猪拉多纳

當見到李斯特城喺主場擊敗新特蘭4比2，大家可能會諗：「咁係因為新特蘭太廢啫。」不過見到「狐狸」作客都贏到韋斯咸，就真係要開始對呢隊波另眼相看。李斯特城今晚主場對熱刺，「狐狸」依家個勢勁到連足智彩都要開「狐狸」讓熱刺一球。不過「狐狸」要豪取3連勝似乎忟水咗啲，始終對手係再高幾班嘅熱刺，而且對方都要爭取首勝，所以今場博大仲啱數。

（now 621周六晚10時直播）

李斯特城成功留喺英超，今季雄心壯志，大事增兵，包括買斷中堅賀夫、引進中場尼高路簡迪同前鋒岡崎慎司，最近仲買埋瑞士國家隊隊長恩拿，個陣容砌砌吓，已經唔只一支護級球隊咁簡單。恩拿加盟冇耐，今場應做住後備先，不過日本球星岡崎慎司上場話咁快就取得英超首個入球，成功踢起信心，有佢加埋英格蘭新進國腳占美華迪，攻力相當有保證。
開季甩轆博反彈

熱刺開季甩轆，首場作客不敵曼聯都算，喺主場對住史篤城，領先緊兩粒都可以畀對手逼和2比2，一班後防認真抵打！熱刺今場差唔多可以夫添出擊，得番安祖斯唐辛一個傷兵，今場唔搏等幾時？熱刺今場一定不惜同李城駁火，力爭喺主場開齋以向擁躉交代，大盤好路。