紅魔發惡拆紐開「主主」

猪拉多纳

迪比金「7」保證

今晚英超早場又有好戲睇，曼聯喺主場對紐卡素，一於博「紅魔」開1.85倍主主。雖然曼聯買唔成柏度洛迪古斯，跟手又要應付歐聯附加賽次回合大戰，但佢哋今季鍾意由半場贏到落尾，而且迪比重振「金7招牌」聲威，擔正做奧脫福主角，既然紐卡素領隊麥卡倫承認有排都未執得掂隊波，邊似有運行呀？（now621台周六晚7:45直播）

其實曼聯喺歐聯附加賽首回合以3:1領先布魯日，次回合作客根本唔使驚，今晚仲有條件去到盡。最重要一點，係「紅魔」今季簽咗前鋒迪比、中場舒尼達連同右閘迪美安後，似乎真係翻生，計埋4場國冠盃賽事，開季7場比賽6次贏波，全部開半勝全勝，睇得出佢哋信心返晒嚟，攻守兩方面都對辦好多。
贊奴沙 羅美路 搏命證身價

係，雖然中場費蘭尼要停賽，後衞菲爾鍾斯又話要養傷，但最近曼聯連翼鋒贊奴沙都番生，根本唔憂冇人用，新加盟嘅門將羅美路，為咗真係奠定自己嘅正選席位，一定會想辨法阻止對手入波，只要新「奧脫福大帝」迪比繼續爭氣，踢番「金7招牌」應有嘅水準，就好大機會幫紅魔開多場半勝全勝，帶挈擁躉收錢。
麥卡倫被插 暗示紐卡素有排執

對家紐卡素就閉翳咯，喺開咧戰慘被修咸頓逼和後，上星期作客又以0:2不敵史雲斯，新領隊麥卡倫被擁躉插完一輪後，話希望球迷喺開季12場聯賽後，再找佢晦氣，暗示自己喺短時間內，根本冇辦法帶番起隊波，加埋右閘真馬特停賽，中場馬維奧斯、穆沙施素高同守將杜密特養傷，就算有馬賽翼鋒泰奧雲加盟，睇怕麥卡倫領軍倒戈都惡唔出樣，今晚都係捧番曼聯「主主」最穩陣。