泰利卡希爾不穩 累車仔甩轆

猪拉多纳

今晚幾場英超，Peter都係較為睇好作客球隊，頭場西布朗主場迎戰車路士，衞冕嘅車仔開咧兩戰1和1負失咗5分，出閘脫腳，衞冕形勢險峻。好彩主帥莫連奴立刻從巴塞簽入前鋒柏度洛迪古斯，要佢初來甫到即做救世主太唔現實。回看季前熱身賽同頭兩輪聯賽，車仔一路未好過，當中有幾個原因：首先係中堅泰利又老一歲，其拍檔加利卡希爾冇速度兼且鍾意「標波」，尤其係上仗對曼城被阿古路先開紀錄嗰球波，佢要負幾大責任，Peter認為如起用另一後衞葛特蘇馬，效果會更勝一籌。
法比仔明顯走下坡

車仔中場悍將尼曼查馬迪掃蕩力強，可惜指揮官法比加斯明顯走下坡，除咗上季季初有個「光輝6星期」外，之後都冇乜突出表現，依家加入佢嘅前巴塞隊友柏度洛迪古斯，睇吓進攻會否有所改善。當然莫帥教波功力唔使懷疑，畢竟38輪聯賽只打咗兩輪，長路漫漫，不能太早下定論，相信作客西布朗會迎來反彈時機。

至於另一場愛華頓主場鬥「一哥」曼城，後者為洗上季頹風重振聲威，勢必想擊敗唔易食嘅「拖肥」力爭3連勝，向列強顯示其霸氣。