巴塞三砌畢爾包照反

猪拉多纳

碧基停賽防線地上最殘

西甲重頭戲畢爾包主場對巴塞隆拿，雙方短短一星期第三次交鋒，巴塞早前西超盃兩回合都贏唔到對手，包括作客慘吞四蛋，最大鑊係兩位防線主力碧基、馬菲奧今仗停賽，令原本已穿窿後防雪上加霜，加上尼馬仍然養傷缺陣、柏度洛迪古斯離隊，攻守能力皆打折扣。畢爾包繼續有得受讓，再追讓球主勝。（now 632周一凌晨零時30分直播）

巴塞由季前熱身賽開始，表現一直乏善可陳，特別係防線走晒樣，歐超盃領先西維爾4比1，都被逼和4比4，最終踢加時先至勝出。之後西超盃首回合更直接吞畢爾包四蛋，堪稱近年最羞家演出。中堅碧基唔生性，次回合鬧旁證被罰停賽四場，今場同馬菲奧一齊坐波監，加上兩位左閘佐迪艾巴、艾迪安奴受傷，好大機會由「玻璃腳」華美倫擔任左後衞，馬斯巴查同馬斯真蘭奴扼守中路。

相信球迷仍記得2014年西班牙盃決賽，馬斯巴查喺領先幾個身位下，被加里夫巴利從後追上射入經典一幕，如果佢今仗正選上陣，巴塞防線肯定危。進攻方面，尼馬仲未踢到，而喺歐超盃射入致勝一球嘅柏度洛迪古斯剛轉投車路士，教練安歷基透露會由廿二歲小將拉芬拿艾簡達拿頂替佢，好難畀到人信心。
阿度里斯留力捅巴塞

畢爾包上周中歐霸盃附加賽首回合，作客領先斯利納兩球之下，最後輸2比3，明顯有所留力。教練華爾維迪當時收起多位主力，其中西超盃兩回合入巴塞四球嘅射手阿度里斯更全場做觀眾，擺明等待今仗全力搏殺，再剃巴塞眼眉。往績上畢爾包近六次主場對巴塞，取得兩勝三和一負，完全唔怕呢支上季三冠王，今場又一次受讓實在抵玩。