美職星級大戰 銀河贏到開巷再追

猪拉多纳

謝拉特大戰林柏特，仲有派路、韋拿、杜斯山度士同羅比堅尼睇，洛杉磯銀河今晚喺主場硬撼紐約城呢場星戰，堪稱今季美職重量級大戰。問題係銀河呢期贏到開巷，今場波明顯側埋一邊，無謂諗咁多，捧2.03倍「讓主」啱數。

今仗波飛兩個禮拜前賣晒，銀河賽前呼籲球迷盡早入場坐定定，又搞咗個頭1.2萬位入場球迷就可以半價購買飛往墨西哥機票嘅優惠，實行谷爆個勢搞到個場熱辣辣！銀河近5戰贏晒兼且勁入18球，杜斯山度士加盟夥拍羅比堅尼嘅攻擊組合又咁煞食，加埋個喺中場踢晒嘅謝拉特，戰績有乜辦法唔好吖？
紐約城頻頻失波

紐約城賽前搵咗幾位球員扮派路、韋拿同林柏特，模仿佢哋早排拍攝嘅「豬肉佬」造型硬照。寸人搞搞震就叻，落到場就冇晒料到，紐約城近7仗有5場失分，對上一次保清白身已經係6月底嘅事，造訪火力強橫嘅銀河睇怕凶多吉少。