般尼茅夫「讓客」起筷

猪拉多纳

食住個勢打乙組仔

今晚英格蘭聯賽盃上演第2圈賽事，幾支英超球隊分途出擊，當中啱啱取得史上首場英超勝仗嘅般尼茅夫，會作客同乙組仔哈特普爾爭出線。呢隊英超新丁有大勇前鋒哥林威爾遜坐陣，呢鋪梗係要乘勝追擊，捧1.95倍「讓客」。

（TVB302周三凌晨2:45直播）
哈特普爾試兵味濃

今季係般尼茅夫創會125年以嚟，首次征戰頂級聯賽，話就話佢哋頭兩場聯賽都輸波失分，但表現其實並唔失禮，最終皇天不負有心人，呢班波上仗憑前鋒哥林威爾遜連中三元，作客以4:3砌低韋斯咸，當堂大大振奮軍心。不過領隊艾迪侯域並無自滿，反而再向水晶宮斟介前鋒杜韋加爾，相信哥林威爾遜都唔敢得意忘形，繼續開火保住正選席位。

對手哈特普爾嘅4連勝紀錄啱啱斷咗纜，作客敗走史提芬納治0:2。呢次越級挑戰般尼茅夫，領隊朗尼摩拿直頭以半放棄心態迎戰，據講連小將奧迪斯今仗都有望首次擔正攻堅，試兵意味極濃。睇番佢哋2年前踢英甲嗰陣，就喺主場以1:2輸畀般尼茅夫，家陣雙方實力相差更遠，哈特普爾仲點擋得住先？