利華精打細算計晒素

猪拉多纳

歐聯附加賽次回合，德甲利華古遜主場迎戰意甲拉素，利華古遜首回合作客輸0比1，返主場當然希望收復失地，但同時亦要慎防失作客入球；拉素前線陣容不整，拎住一球領先優勢到訪拜耳球場，當然歎慢板。兩軍實力接近，利華古遜贏面稍高，但讓到半一嫌多，寧吼細盤。

（有線64及203台周四凌晨2時45分直播）

少帥羅渣舒密特上季初接手利華古遜，球隊戰術同踢法不斷從實戰中調整同成長，由季初瘋狂搶逼，有前冇後急攻，到季中以後更注重防守，令攻守更加平衡，尤其歐聯，連同首回合作客拉素，球隊近四場歐聯賽事全開細盤，4場比賽總入球加埋都只得3個。何況目前形勢緊湊，基於首回合攞唔到作客入球，今仗要收復失地之餘，首要目標係唔畀拉素入波，可幸佢哋主場表現一向堅挺，自今年3月中至季尾，連續6場主場聯賽保持零失球，不過前線仍未進入最佳狀態，上周末德甲作客弱旅漢諾威只靠查漢奴古一記美妙罰球險勝，頻密賽程亦令佢哋焗住步步為營，喺比賽早段唔會All-in對手。
拉素「拖字訣」應戰

拉素係上屆意甲季軍，實力同利華不相伯仲，不過今仗前線人腳不整，箭頭菲臘佐積域同高路斯因傷缺陣，但首回合停賽嘅左閘史堤芬拉度復出，人腳復整可以更專注防守。球隊近11場作客嘅歐洲賽事只輸1仗，加上意大利球隊防守一向到家，既然作客兼有領先優勢，當然用一貫擅長嘅拖延戰術，將90分鐘比賽變成70分鐘，入球又點會多？