利華精銳盡出「拉」唔住

猪拉多纳

今晚繼續歐聯附加賽次回合嘅天下，德甲球隊利華古遜同意甲嘅拉素會再度交鋒。首回合利華作客以0:1敗走意大利，為咗殺入歐聯分組賽呢個金礦，呢鋪回師主場肯定喪攻。撞啱「藍鷹」今仗有多位主力缺陣，利華梗係趁佢病攞佢命，讓半一照捧1.78倍上盤。

（有線64及203、中央5台周四凌晨2:45直播）

對於拉素嚟講，呢支意甲球隊梗係希望繼07年後，再次打入歐聯分聯賽搵番筆。尤其係佢哋已經連續9季冇心口贊助，收入大減下搞到球會賽前都講到明，想董事局科水增兵，但就要過埋利華古遜呢關先至有偈傾。
拉素傷兵多焗用小將

不過「藍鷹」增兵心願睇怕冇咁易達成，呢支上季意甲「三哥」雖然喺聯賽首戰主場打敗博洛尼亞2:1，連勝氣勢係就係打咗出嚟，但弊在一班主力球員開季就已經陸續受傷，好似中場隊長碧基亞、一對箭頭高路斯、菲臘佐積域同埋門將馬捷迪打柴，令教練皮奧利焗用小將巴爾迪基達、基舒拿、卡達迪頂上，最慘係呢3件生牯仔22歲都未夠，頂唔頂到咁大壓力先？咁搞法「藍鷹」好易攻不銳守不穩喎！

「東道主」利華今仗有幾大決心贏波就唔使多講，相比拉素喺聯賽精銳盡出，利華上場德甲作客漢諾威就分別收起翼鋒比拿拉比、中堅柏柏杜普路斯打後備，依然輕鬆小勝對手1:0，證明班波狀態唔曳。加上鋒將孫興民復出，拍住射手傑斯寧攻堅，全力出擊下睇嚟呢仗真係志在必得。

何況呢支德甲球隊主場威力強勁，上屆歐聯5次主場出擊贏足4場，對手仲包括馬體會、辛尼特、賓菲加等歐戰常客，咁你話佢哋呢鋪仲點會赦拉素先？