(六)21 利物浦 vs 韋斯咸 紅軍扑錘夠細心

猪拉多纳

利物浦上場英超作客阿仙奴能夠全身而退，好多利迷都感到安慰，紅軍竟然踢咗3場一球不失，真係還得神落。今場返到主場迎戰「錘仔幫」韋斯咸，唔好預期紅軍可以大勝一場，因為「錘仔幫」應會做好防守，避免再輸一場，今場不妨博吓2.15倍嘅入球細。

（now 623周六晚10時直播）
韋斯咸學精求穩守

韋斯咸開咧戰爆大冷擊敗阿仙奴，點知之後兩場無以為繼，連輸兩場主場，包括上場不敵升班球隊般尼茅夫3比4。對住升班球隊都失4球，真係幾羞家，相信領隊比歷都學精咗，今場對紅軍暫時放棄漂亮足球，以守為先。況且「錘仔幫」今場有門將阿祖安卡斯迪路同後衞贊堅臣坐波監，冇咗防線兩大主力，更應屯重兵喺後防喇！

利物浦近日有「玻璃腳」史杜列治復操，買入嘅「水貨」拿沙馬高域將會被借去費倫巴治，紅軍今場有隊長佐敦軒達臣因傷上陣成疑，拉爾拉拿亦掛免戰牌，領隊羅渣士今場好可能沿用上仗3中場組合，派出占士米拿、安利簡恩同盧卡斯，呢個組合掃蕩力的確夠強，但就冇乜創造力，令到進攻主要靠菲臘比古天奴一個，新兵羅拔圖法明奴仲需要時間適應，單箭頭賓迪基喺前面就顯得孤掌難鳴。紅軍防守的確進步咗好多，但攻力仍有待加強，今場細盤值捧。