當弗科隆 大啖o趙漢堡

猪拉多纳

今季德甲球隊入局好快，頭兩輪已經勁緊湊同埋產生唔少精彩入波，今晚科隆主場迎戰漢堡，好可能又係另一場大手交易！科隆頭兩場表現令人喜出望外，新星前鋒西蒙祖拿閃電彈起，腳風順到冇朋友，作客嘅漢堡同樣擺齊幾支當弗大炮出嚟，睇嚟準備好晒同科隆駁火，呢次1.85倍入球大穩陣呀！

（有線64及203周六晚9:30直播）

連埋德國盃在內，科隆今季踢3場有2勝1和，上場對住上季聯賽亞軍禾夫斯堡，都係去到尾段先被逼和。有咁好成績，射手西蒙祖拿一加盟就有料到係主要原因，呢位24歲前鋒過去3場賽事都有入波，有佢同已經開咗齋嘅莫迪斯迪拍住攻堅，就算今場有波蘭中場柏斯高停賽，都唔驚冇波入啦。
佐羅受傷漢堡防線更弱

作客嘅漢堡防線問題一直為人詬病，連續兩季要踢附加賽先至有得留低，點知經歷過「生死邊緣」，嚟到今季依然冇改善，開咧兩場勁失7球，不過好在前鋒爭氣，拉蘇加威脅力大，攻擊中場伊利斯域更係狀態大勇，漢堡對上14次射門中龍，有10球都係由佢直接處理或間接策動，難怪連老將射手奧歷都要做後備！

可惜佢哋後防始終問題多多，隊長中堅佐羅仲要因為左腳大腿肌肉撕裂，要抖一段時間，真係雪上加霜。雖然漢堡今個星期一口氣簽3個新兵：包括捷克中場積拉錫，法國中場穆罕默德古艾達同迪米亞巴爾，問題係遠水難救近火，睇嚟今場都係惟有以攻代守好喇！