墨爾本勝利超班夠鑊氣

猪拉多纳

嚟緊國際賽檔期，大部分主流聯賽都要讓路，所以周中受注賽事均以二線波為主。今日下午有澳足盃十六強直播，由地區球隊洛克達爾太陽挑戰上季澳職季後賽盟主墨爾本勝利。地區球隊與澳職球隊實力差距大，爆冷次數絕無僅有，有心爭盃嘅墨爾本勝利料可輕鬆過關，讓二球照捧讓球客勝。

（有線64及203台周二下午5時30分直播）
洛克達爾太陽業餘水準

澳足盃於去年創辦，各地區球隊先透過外圍賽爭入主賽圈，去到三十二強則有十支澳職代表加入角逐。近兩屆比賽曾出現過十四次澳職、地區球隊對碰，結果除上屆西悉尼流浪者於三十二強被阿德萊德城踢出局，其餘十三次澳職球隊於法定時間取得十二勝一和優勢，足證兩者實力之間差距有幾大。

墨爾本勝利向來對澳足盃非常重視，上圈大炒巴爾曼老虎6比0，主力貝利沙、巴巴路西斯均正選上陣，而且上屆十六強亦以6比0大勝另一支地區球隊塔格拉諾聯，以洛克達爾太陽嘅業餘級數難阻佢哋去路。

另外今晚仲有由英甲、英乙球隊角逐嘅英格蘭聯賽錦標第一圈賽事，英乙阿克寧頓主場對英甲貝利，阿克寧頓對上三季均於第一圈出局，擺明無心爭盃。貝利今季作客三戰不敗，共攻入六球，索亞里斯、丹尼羅斯、李安奇勒等前線好手狀態弗爆，捧客W。另一場英乙紐波特郡主場鬥英甲史雲頓，紐波特郡現於英乙排包尾，護級水深火熱，勢難分心盃賽，捧近兩場作客不敗嘅史雲頓客W。