啞火球王爭拾射門鞋

猪拉多纳

弱勢高盧雞醒C朗開齋

貴為球壇絕代雙驕，美斯同C朗入波一向易過食生菜，不過踏入新球季，兩人卻罕有地齊齊熄火，美斯頭兩場西甲冇士哥，創下個人8年來最差開局，C朗更加連續5場食白果，咁嘅現象極之反常。兩大天王見慣風浪，適逢依家國際賽期，佢哋梗係想趁住為國踢「太公波」，重新搵番對射門鞋，證明呢啲幻覺嚇佢哋唔到。

今晚重量級國際熱身賽，由葡萄牙喺主場迎戰下年歐國盃決賽周東道主法國，亦係C朗同皇馬隊友賓施馬正面交鋒，後者依家喺「銀河艦隊」反而更得寵，一向做慣大佬嘅C朗，又點會吞得落呢啖氣？況且「高盧雞」近年恰住葡萄牙，為國為己，C朗勢必搏甩髀爭勝威番鋪，主W不容錯過。

（有線64及203台周六凌晨2時45分直播）

法國因係下年歐國盃決賽周主辦國，唔使踢外圍賽而搵I組球隊「拍跳」，但對葡萄牙萬人迷C朗嚟講，絕非熱身賽咁簡單。自從賓尼迪斯今夏接手皇馬後，用加里夫巴利打攻擊中場，變相分薄咗C朗嘅進攻揸弗權，連同季前「拍跳」在內，C朗竟然連續5場冇波入，包括頭兩場聯賽16射0球！
葡軍新帥愛打突擊

至於賓施馬，上仗傷愈即有得落場兼入波，呢位法國中鋒又擅於鋪橋搭路，比起吓吓要爭功嘅C朗，更受到「肥賓」睇重。今次兩人難得正面交鋒，C朗必定會施展渾身解數，向「肥賓」證明自己先係頭號王牌。而且葡萄牙一向都圍繞C朗做核心制訂戰術，其他球員如拿尼、哥利斯馬，都要為呢位萬人迷服務，上年9月先上任嘅主帥費蘭度山度士，又習慣打穩守突擊，更加凸顯到C朗嘅速度優勢。
法國近4仗輸3場

查實論人腳，法國比葡萄牙略勝一籌，不過佢哋之前4場輸咗3仗，話就話全部只係熱身賽，但佢哋必須靠呢啲賽事練兵，連阿爾巴尼亞都輸得，實在講唔通，難怪主帥迪甘斯畀人鬧到狗血淋頭。王牌保羅普巴又未弗，加上迪帥試陣愈試愈亂，尤其係防線錯漏百出，近兩仗失5粒都幾得人驚。儘管葡萄牙下周有歐國外對阿爾巴尼亞嘅後顧，但C朗急於破入球荒，撞正「高盧雞」弱爆防線，仲唔係騷哥利嘅好時機，為雙方近6次交手不勝嘅葡軍贏番場攞彩咩，主W值博。