西班牙-1照討伐

猪拉多纳

C組榜首大戰西班牙主場迎戰斯洛伐克。斯洛伐克今屆外圍賽6戰全勝，包括首循環主場爆冷擊退西班牙，不過今場佢哋有4名主力缺陣，加上西班牙對上7場歐國盃主場外圍賽錄得全勝，有力報番一箭之仇，讓球主客和西班牙讓一球，捧讓球主勝。
（有線61及201台周日凌晨2時45分直播）
斯洛伐克4主力缺陣
西班牙今次點兵，焦點落喺巴西世盃後首度入選嘅曼聯中場桑馬達與及傷愈回歸嘅車路士射手迪亞高哥斯達。當中開咧後僅入1球嘅巴西裔入籍前鋒「迪哥」急欲重拾射門鞋，今場有狀態大勇嘅大衞施華及柏度洛迪古斯提供彈藥，定必盡情數胡。
斯洛伐克現以3分力壓西班牙高踞榜首，雙方去年10月首循環碰頭，斯洛伐克主場贏2比1，終止「鬥牛兵團」連續36場外圍賽不敗走勢，不過今次主客互掉，斯洛伐克卻全冇甜頭，事關有利物浦中堅史卡迪爾及AC米蘭中場古卡停賽，守將杜歷卡及創造型中場華迪美韋斯養傷，中後場陣容嚴重不整。況且西班牙喺歐國盃外圍賽主場出擊表現極佳，對上7仗全勝，只要今場佢哋贏多過1球，便可憑較佳對賽成績反壓對手上榜首，就算領先相信亦唔會放軟手腳，捧讓球主勝好合理。