撐法林上盤致「富」

猪拉多纳

巴甲今晚有唔少好戲碼，當中富明尼斯喺主場對法林明高，似乎好難開到W，主要原因係富明尼斯簽入朗拿甸奴後，似乎仲衰過未簽嗰陣，搞到「細哨」對上1次喺主場上陣，衰到畀自己球迷狂噓，今場倒戈領軍迎戰法林明高，相信都好難有運行，受讓平半都玩唔過！
富明尼斯連輸3場

由於狀態唔夠，朗拿甸奴加盟富明尼斯後，並唔係每場都可以上陣。雖然上周中「細哨」已經掛咗免戰牌抖咗場，今戰預計會披甲，可惜佢加盟後表現勁唔對辦，隨時佗衰家連累富明尼斯失分，特別係對手法林明高近排喺巴甲連贏3場強勢反彈，相反富明尼斯就連續3場冇分落袋，法林明高作客讓平半照捧1.97倍上盤啦！