英軍瑞士熱血大戰

猪拉多纳

三獅後備兵爭上位

成為首支殺入2016年歐洲國家盃決賽周嘅英格蘭，周三凌晨將喺E組主場迎戰「二哥」瑞士，「三獅」領隊鶴臣透露會利用餘下三場外圍賽試陣，一班副選為爭取表現今場都唔敢揸流攤。作客嘅瑞士要搶分出線，兩軍近年交手例必對攻，今場建議捧入球大。

（有線61及201台周三凌晨2時45分直播）

英格蘭喺E組7戰全勝一枝獨秀，「魚腩」聖馬力諾上場無力當攔路虎，力爭出線嘅瑞士預期可為佢哋帶嚟較大考驗。兩隊去年九月對戰時，「三獅軍團」憑前鋒韋碧克梅開二度作客贏2比0，「韋大帝」今次受傷休戰，若然上場踢正選嘅朗尼、阿歷士張伯倫、巴克里、占士米拿等今仗一概做後備，球隊仍有哈利卡尼、禾確特及史達寧等質素不俗嘅進攻球員，呢班後生仔為奠定國家隊位置肯定搏晒命，英軍今場唔愁冇波入。況且朗尼仲有一項紀錄等住要破，上場佢以四十九個國家隊入波追平卜比查爾頓入球紀錄，要登基成為英軍「士哥王」，今場無論獲派正選定後備，一落到場都要爭取入波！
瑞士未出線仲要砌

「三獅軍團」同瑞士喺溫布萊球場交手絕無冷場，兩軍近五次對戰四次開大，其中兩場就係喺溫布萊球場進行。瑞士現以十五分排喺E組次席，球隊上場贏得勁熱血，對斯洛文尼亞喺落後兩球之下，下半場八十分鐘開始內連入三球反勝，其中前鋒祖斯比迪米斯更梅開二度。依家瑞士士氣正盛，作客「三獅軍團」都冇有怕，大盤值得捧場。