中日「讓客」明益你

猪拉多纳

馬爾代夫 阿富汗失地利

世界盃亞洲區外圍賽今日繼續，東亞三強中、日、韓再分途出擊，其中中國、日本兩場客戰都响中立場舉行，中國嗰場實質上仲喺自己地頭踢添，呢類波唔使諗梗係博強嗰隊，中、日兩個「讓球客勝」都諗得過。

先講中國喺C組「作客」對馬爾代夫嗰場，事關佢哋同香港同組，勝負可能影響呢個組嘅形勢。由於馬爾代夫個場唔掂，佢哋將個主場「搬」咗去瀋陽，中國隊變相多咗場主場波，所以外界一致認為國足着數晒，今場波唔贏真係丟架過打和香港，人人都覺得會係一次大屠殺。
中國作客變「主場」

中國隊係咪咁易炒爆馬爾代夫呢？以實力對比，應該係3球或以上先正路，但係國足中場組織力差，門前把握曳，真係畀唔到人絕對信心。不過，呢場波舉行嘅場地比較爛，根本唔適宜搓上腳，咁反而益晒中國隊粗枝大葉嘅踢法，佢哋呢兩日亦狂操兩邊傳中破密集，仲好大機會打雙箭頭，馬爾代夫應該未必頂得住國足嘅空襲，輸4球唔係奇事，「讓球主客和」中國讓3球唔算多。

（中央5台、廣東體育周二晚7:35直播）
日本一早熟習伊朗氣候

日本E組客戰阿富汗嗰場，亦都因為阿富汗政局動盪，安全冇保證，改咗响伊朗首都德黑蘭上演。日本由舊年12月起，5次對中西亞球隊取得4勝1和，今日對住世界排名130嘅阿富汗，理應贏到3、4粒。好多人擔心海拔1,200米高嘅德黑蘭，會唔會對「藍武士」班人造成影響？其實又唔使驚喎，日本隊上星期六就到咗當地，而且專登揀比賽時間下午5:30左右練波，話就話氣溫都成35度，但係濕度得10%，熱得嚟乾爽，唔係香港嗰隻蒸籠一樣嘅濕熱，班球員完全冇適應問題。

日本同中國隊一樣，賽前狂練兩邊拉開破密集，右腳有啲傷嘅岡崎慎司都冇大問題，可以拍住武藤嘉紀攻堅，贏阿富汗冇乜難度。

（開賽時間：周二晚8:25）