歐聯遇弱PSG全力炒起波爾多

猪拉多纳

國際賽期結束，各國聯賽重燃戰火，但原來歐聯同歐霸分組賽下周中就會揭開戰幔，真係好考各隊嘅兵源同主帥嘅戰術調整。今晚法甲獨腳戲巴黎聖日耳門（PSG）主場對波爾多，兩隊下周都要踢歐戰，PSG喺歐聯主場對馬模，波爾多則喺歐霸主場迎戰利物浦，點睇都係PSG易打啲，今場冇後顧之憂，撐PSG讓球勝！

（TVB 302周六凌晨2時30分直播）

PSG上季同波爾多喺次循環碰面，PSG作客輸2比3，爭啲因為咁而冇咗個聯賽冠軍，王牌前鋒伊巴謙莫域賽後更發晒癲，怒剝波衫鬧球證，仲當住鏡頭炮轟法國係「狗屎國家」，雖然伊巴謙今場未能上陣，但佢嘅隊友都想贏波報一敗之辱。PSG開季4戰全勝入7球失0球，表現超晒班。波爾多上場喺歐霸盃外圍賽附加賽作客哈薩克球隊卡拉特都輸波，今場對住咁弗嘅PSG冇運行，直取讓球主勝！
串埋利雲特細雷丁上盤

阿King再推介多兩場賽事畀大家，先有西甲獨腳戲利雲特主場對西維爾，西維爾今季人面全非，仲未磨合到，搞到踢完頭兩輪西甲都未開齋，今場作客利雲特難大勝，捧細盤。

（now 632周六凌晨2時30分直播）

最後英冠雷丁主場對葉士域治，雷丁喺轉會窗關閉前借得車路士潛力新星盧卡斯皮亞桑及奧拉約翰等球員，實力有望增強，加上過去四次主場對葉士域治全勝，雷丁讓平半上盤博得過！