曼城搶宮5連捷

猪拉多纳

英超踢咗4輪聯賽，但勢都估唔到中型班嘅水晶宮今晚竟然成為榜首大戰嘅主角，主場挑戰全勝之師曼城。無可否認，水晶宮季初演出令人驚喜，不過級數始終同曼城有距離，尤其係呢支富豪球隊剛使咗近8,400萬鎊（約10億港元）簽入奇雲迪布尼及奧達文迪呢一攻一守嘅猛將，陣容如虎添翼。兩位新將喺呢場「地標戰」當然要騷哥利演身價，一於追曼城5連勝捷。曼城讓半一照捧上盤。

（now621周六晚10時直播）
助攻王帶動鋒線

曼城開季4戰全勝入10球兼不失波，每場都淨贏兩球或以上，以12分高踞榜首，表現可謂無懈可擊。不過高層仲未滿足，再以天價收購比利時中場大將奇雲迪布尼同阿根廷鐵衞奧達文迪，明顯係要補強陣容，為爭英超及歐聯雙線作戰鋪路。當中以奇雲迪布尼最令人期待，呢位比利時國腳3年前加盟車路士，但發展未如意，黯然轉戰德甲。不過亦成為佢重生轉捩點，上季德甲入10球及20次助攻，踢出職業生涯巔峰一季，率領禾夫斯堡成為聯賽亞軍兼捧走埋德國盃，最終落戶藍月亮，成為英超其中一位「打工皇帝」。

曼城擁有呢位「助攻王」幫手，阿古路、史達寧、大衞施華等隊友，肯定有大把入波機會，屆時攻力更加得人驚。至於奧達文迪來投亦可進一步穩固防線，而且陣中有多位阿根廷人，大家同聲同氣，有助建立凝聚力。曼城現時狀態及人腳質素，比13/14年球季捧英超冠軍時更強大。
水晶宮靚績靠唔住

水晶宮早前爆大冷擊敗車路士，令人刮目相看，但要留意車仔今季表現一直低迷，呢場勝仗難以作準。至於另外兩場勝仗對手只係諾域治同阿士東維拉，「水份」唔少，根本唔可以同曼城相提並論。水晶宮季初靠打一道氣，但偏偏撞正國際賽檔期隔一隔，令呢股熱情隨時已經「攤凍」，之前戰績恐怕信唔過，主場受讓半一冇着數，都係唔好鬥氣曼城上盤。