米蘭打吡和氣生財

猪拉多纳

聖西路開專賣店夾計搵銀

國際米蘭同AC米蘭兩支意甲傳統勁旅，近年愈踢愈霉，莫講話挑戰聯賽錦標，上季仲衰到齊齊失落參戰歐洲賽事資格。呢對難兄難弟今季痛定思痛，各自掟咗超過8,000萬歐元（約7億港元）擴軍，誓要重拾昔日光輝。但考慮到兩軍新兵仍處於磨合階段，而且共用聖西路球場，「主場」出擊嘅國米亦未見佔地利，加埋兩隊嚟緊會喺聖西路合作開專賣店搵銀，今場打吡隨時和氣生財開 3.15倍和。

（TVB301周一凌晨2:45直播）

「藍黑兵團」今季大換血，一口氣引入鋒將祖維迪、比列錫、中場干度比亞、菲臘比美路等星級戰將加強實力。之但係成班波都要時間培養默契，睇番佢哋聯賽開局兩戰對住阿特蘭大同卡比，同樣只能靠祖維迪建功險勝對手，就知成班攻擊球員明顯未夾熟，仲未產生到化學作用。
新兵未夾熟欠默契

同樣大事增兵嘅AC，鋒線位置上更一口氣添置卡路士巴卡、雷斯阿祖安奴同巴洛迪利3件前鋒。雖然前兩者上仗各自開齋，不過教頭米赫洛域仍然唔收貨，話表現未達水準，加上「紅黑兵」首席射手文尼斯、中場貝圖拿斯休戰，人腳不整對住同市宿敵未必肯主動搶攻。

雖然打吡戰向來有你冇我，不過米蘭雙雄賽前反而齊齊合作搵銀。國米近日喺官網宣布，會同AC喺聖西路球場合作開設球迷專賣店賣兩隊嘅Product，實行和氣生財。Friend成咁，今仗整番個皆大歡喜嘅和波結局唔出奇吖！