Fans大手筆撲黃牛飛撐場 小保加夫復「河」求

猪拉多纳

阿甲「超級經典打吡」聽朝爆發，由於小保加球迷今年5月喺自由盃搞事，今仗造訪河床呢場大戰，阿根廷足總只係准河床賣波飛畀自己Fans。不過有消息話，唔少「河粉」都喺網上轉售波飛圖利，據報大批小保加球迷不惜使成千銀美元撲黃牛飛入場，出錢出力撐小保加喎！

冇錯，小保加上輪聯賽輸畀聖羅倫素痛失榜首席位，但要知道泰維斯同加高都冇喺嗰場波披甲，呢兩位球星為阿根廷國家隊披甲之後已經歸隊，今仗可以候命，令小保加戰鬥力同士氣得以大幅提升。

應屆自由盃盟主河床狀態麻麻，近4仗得1勝1和2負，上仗4:1大勝新芝加哥睇落好醒，但唔好忘記對手只係超級弱旅。最大鑊係河床條後防線家陣鬧緊兵荒，中堅馬丹拿左腳小腿受傷缺陣，剛啱由紐維爾舊生來投嘅左閘卡斯高亦未必趕得切落場，啱使嘅後衞唔多，平手盤捧小保加好

過咯！