曼城上盤「尼」料

猪拉多纳

祖雲達斯大跌Watt

歐聯今晚回歸，焦點肯定係曼城硬撼祖雲達斯嘅「死亡D組」大戰！話就話「藍月亮」好可能有3大星級戰將缺陣，但堂堂「億萬大軍」梗有大把法寶。奇雲迪布尼、拿斯尼同韋菲特邦尼「3尼」臨危受命實搏盡省招牌，對住今非昔比嘅「斑馬兵團」，「藍月亮」讓半一梗係捧上盤啦！

（有線64及203、中央5台周三凌晨2:45直播）

過去兩屆歐聯都喺16強止步嘅曼城，新季大灑金錢掃入史達寧、奇雲迪布尼同奧達文迪3大貴價貨，矢志揚威英超同歐聯兩大戰線。球隊亦冇令Fans失望，開季遇神殺神，英超頭5戰贏晒之餘仲保住清白身，當中主場大炒車路士3蛋場波更加係代表作。阿根廷射手阿古路上仗鬥水晶宮撞傷膝頭，加埋史達寧同大衞施華都有傷在身，「藍月亮」今仗可能會冇晒呢3粒星，但亨格比利就一啲都唔擔心，事關佢哋仲有「3尼」壓陣。
阿古路 史達寧 大衞施華傷晒

曼城「標王」奇雲迪布尼係上季歐洲聯賽助攻王，呢位比利時中場一直想證明車路士當初放棄佢係錯誤決定，家陣代表曼城喺歐聯舞台上陣，肯定想證身價。至於「邊緣人」拿斯尼同韋菲特邦尼，亦希望趁機取悅主帥比歷連尼，今場若果有機會擔正，仲唔加多兩錢肉緊省靚招牌咩！以「藍月亮」新季5戰勁入11球嘅走勢嚟睇，比帥實會繼續大打進攻足球，藉地利攻到祖雲達斯甩轆都似。
祖記創史上最差意甲開局

雖然「斑馬兵團」大戰經驗豐富，兼且係去屆歐聯亞軍，但隨住派路、維達爾同泰維斯今夏離隊，呢支意甲班霸亦都跌晒Watt，新季意甲3戰錄1和2負劣績，係創會以嚟最差意甲開局。鎮隊之寶保羅普巴受轉會傳聞影響，新季仲未踢出水準，佢嘅中場拍檔馬治斯奧仲喺上場意甲傷出，證實腿筋肌肉受傷要抖1個月，意味住巴西攻擊中場靴蘭尼斯又要客串防中一職，頂唔頂得住耶耶托尼等人嘅進襲係一大疑問，去到曼城地頭唔似有運行。