美斯喜上喜巴塞速破狼

猪拉多纳

再做老竇 歐聯百戰

美斯歐聯百戰誓速破「狼」！今晚歐聯E組重頭大戰，衞冕嘅巴塞作客撲擊意甲勁旅「雌狼」羅馬。巴塞王牌美斯喜事重重，除咗啱啱再做老竇之外，今仗亦踏入自己第100場歐聯賽事嘅里程碑，梗係唔衰得喇，而且「地上最強」一向搶韁，對上5次歐聯作客賽事均於上半場贏波，羅馬就算有地利亦好難頂得住，巴塞半場勝咪錯過。

（有線61及201台周四凌晨2時45分直播）

唔經唔覺，過去11年美斯由一名潛力無限嘅超新星，蛻變成舉足輕重嘅球王，如果今仗作客羅馬能夠披甲，便成為佢於歐聯第100戰，亦係繼沙維、佩奧爾、域陀華迪斯同恩尼斯達之後，第5位踏入歐聯百戰里程碑嘅巴塞球員。睇番之前99場，美斯一共轟入77球，場均0.78球比死敵C朗更勝一籌，為巴塞4度登上歐洲之巔，包括09年決賽對曼聯，罕有地用頭槌頂成2比0嘅經典時刻，正正係發生喺今仗嘅場地——羅馬嘅奧林匹高球場。
上屆5客戰全開半場勝

美斯近期人逢喜事精神爽，唔單止啱啱迎來二仔Mateo出世，日前聯賽作客馬體會之役，佢後備入替為巴塞射入奠定勝局嘅士哥，協助球隊3戰全勝升上榜首。美斯個勢咁旺，加上今仗係其歐聯百戰嘅大日子，又點會想失威呢？「地上最強」教頭安歷基深明作客賽事難打，因此奉行速戰速決策略，翻查巴塞上屆奪冠之路，唔計決賽於中立場戰勝祖雲達斯，佢哋之前5次作客均開出半場勝，對手包括拜仁慕尼黑、巴黎聖日耳門、曼城等強敵，當中只有1場遭反勝，「MSN」美斯、尼馬及蘇亞雷斯，更包辦這5仗半場巴塞的8個士哥，非常厲害。
羅馬不擅守習慣先失

「雌狼」羅馬一向係神經刀，順起上嚟就贏到開巷，唔順嗰陣即潰不成軍，上屆於分組賽曾喺主場慘敗拜仁1比7，半場已經落後0比5。除此之外，連同下半季降格踢歐霸在內，「雌狼」上屆一共踢咗10場歐洲賽，有6場先失波，證明佢哋並不擅守，遇上旺到冇朋友嘅美斯帶領、最鍾意做「急先鋒」嘅巴塞，上半場落後絕不出奇，巴塞半場勝有2.02倍非常值博。