車仔知衰踩油吼半場大

猪拉多纳

歐聯G組車路士主場迎戰以色列球隊特拉維夫馬卡比，車仔今季甩轆成績走晒樣，領隊莫連奴都冇晒計，竟然下令操練期間唔准講笑，無非要求球員以最嚴肅認真態度提升表現，但外界聽到真係笑爆嘴，亦反映車仔上下壓力已達臨界點，隨時大爆發。特拉維夫馬卡比由前車仔中場祖簡奴域執教，熟悉對手路數，可望迅速入局駁火，博2.1倍半場大。

（有線62及202台周四凌晨2時45分直播）

車路士今季英超五戰只得一勝一和三負，失咗十二球，已差不多等於上季聯賽總失球四成。屋漏偏逢連夜雨，首席門將泰拔高圖爾斯又因傷長抖，令防線更隱憂。無奈車仔承受壓力愈來愈大，急需要一場漂亮勝仗重振士氣。由於特拉維夫馬卡比實力相對較弱，估計莫連奴會擺大個頭搶攻，爭取盡快入波，以免夜長夢多。
特拉維夫馬卡比駁火偷雞

特拉維夫馬卡比同車仔好有淵源，教練祖簡奴域球員時代曾於2000至2002年効力車路士，後衞賓希姆更加踢過車仔、曼城、韋斯咸等多支英格蘭球隊，佢喺07年短暫同莫帥合作過，但未受重用。祖簡奴域同賓希姆都係車仔棄將，再遇舊東家，更希望做齣好戲；特別係車仔處於低潮，令特軍更放膽一博，隨時有意外收穫。