撐巴塞屠「狼」

猪拉多纳

美斯歐聯百戰要攞威

歐聯分組賽E組大戰今晚爆發，喺主場迎戰巴塞隆拿嘅羅馬雖然有主場之利，可惜「雌狼」隊長托迪根本未弗，教練魯迪加西亞賽前仲話要奇迹出現先有望贏波，擺明冇信心搶分。另邊廂巴塞球王美斯個人第100次喺歐聯上陣，梗係想贏番場好好睇睇啦，讓1球照捧2.03倍上盤！

（有線61、201及中央5台周四凌晨2:45直播）

羅馬剛戰喺意甲作客2:0砌低費辛隆尼，新加盟嘅門將施捷斯尼表現對辦，開季3場只係失兩球。弊在佢哋位隊長托迪因為狀態問題，缺席頭兩場聯賽，對費辛隆尼場波係佢今季首次上陣，連之前惡鬥祖雲達斯嘅大戰都冇份落場，由此可見月底就足39歲嘅「狼王」狀態已經大不如前，「雌狼」靠佢孭飛好難惡得出樣。
羅馬主帥認低威

羅馬喺上個月嘅國際冠軍盃，曾經慘吞巴塞3蛋，搞到教練魯迪加西亞賽前驚到震，仲用「恐怖製造機」嚟形容對方。雖然魯迪加西亞都話唔會扯白旗投降，但亦承認要有奇迹出現先有機會贏巴塞，明顯未打先認低威。主帥冇信心主將未Fit，羅馬仲有中場比真歷因傷繼續缺陣，新加盟嘅迪斯高又未同隊友夾熟，想搶分執番身彩又係難嘅！
碧基復出鎮守防線

巴塞早兩日喺西甲作客以2:1反勝馬德里體育會，冇錯佢哋有中堅華美倫傷出，幸好喺聯賽坐波監嘅碧基可以復出鎮守後防。睇番嗰場攻入致勝入波嘅美斯都係後備上陣，擺明留力應付今場歐聯大戰，要知道今場係呢位「球王」第100場歐聯賽事，唔搵羅馬祭旗就勢係假啦！