紅軍征法捱細界

猪拉多纳

歐戰作客腳軟 6大主力避戰

歐霸分組賽今晚揭開序幕，英超沒落豪門利物浦，將於B組作客硬撼法國球隊波爾多。紅軍唔單止經歷英超兩連敗，佢哋上屆無論係踢歐聯或歐霸，作客賽事都贏唔到兼且全部開出入球細，而且事先張揚收起6大主力，面對防守硬淨嘅波爾多，唔慌多波入，一於捧細盤。

（now 670周五凌晨1時直播）

利物浦今季雖然買入賓迪基、丹尼艾格斯等多名進攻球員，但開咧後各項賽事踢咗5場波，入得3粒咁大把，睇嚟前線嘅重建工作唔多順利，好似上仗「雙紅會」輸畀曼聯1比3之役，主帥羅渣士為咗要踢4-3-3陣式，夾硬將丹尼艾格斯改打唔擅長嘅翼鋒位置，成件事搞錯晒，攻力點會好。今仗紅軍於B組作客波爾多，除咗隊長佐敦軒達臣要繼續養傷外，仲收起賓迪基、占士米拿、史卡迪爾、尼達利基尼、洛夫蘭同盧卡斯，無論攻守實力都大打折扣。
波爾多逼和PSG士氣盛

法甲球隊波爾多出名防守硬淨，近6仗就有4場開細盤，睇埋佢哋今季4次主場出擊嘅正式賽事，有3次可以保持不失，日前聯賽於打少個嘅劣勢下，作客逼和班霸巴黎聖日耳門（PSG）2比2，球隊士氣大增。最後一提利物浦唔單止聯賽連敗畀韋斯咸同曼聯，佢哋更係不擅歐戰客場出擊，上屆於歐聯同歐霸合共踢咗4場作客，錄得1和3負之餘，有3仗開出入球細，今仗都幾難咬得入頑強嘅波爾多，何況羅渣士希望唔輸止蝕，隨時會踢得更加保守，入球細乃不二之選。