緬恩斯開W搶「芬」

猪拉多纳

「孖寶兄弟」火力猛

羅拔圖法明奴變古蘭爾，爭好遠喎！賀芬咸今季賣走巴西國腳法明奴後，竟然搵回晒塘嘅古蘭爾返德甲做替補，唔怪得班波新季死氣沉沉，今晚場德甲獨腳戲隨時畀緬恩斯「孖寶兄弟」武藤嘉紀、尤路斯馬爾尼射瓜，撐緬恩斯2倍主勝啱數。

（now670台、有線61及201周六凌晨2:30直播）
賀芬咸老將古蘭爾回塘

賀芬咸今季折箭，季前一鋪過賣走晒法明奴、莫迪斯迪兩大射手，執咗四千幾萬歐元後寒酸買人，簽咗伊度亞度華加斯、古蘭爾返嚟頂檔，冇嘢呀？當中33歲嘅古蘭爾近5年踢俄超已經唔係叻，最近仲孖住胞弟喺斯圖加特搞夜店，仲邊有心機踢波吖，怪唔得佢加盟以嚟未開齋之餘，而且連累到賀芬咸未打開勝利之門添。

另邊廂嘅緬恩斯新季夠晒驚喜，早排連贏慕遜加柏、漢諾威後，上仗作客輸畀史浩克04亦唔係一味捱打，表現有晒交代。
緬恩斯睇穿對手弱點

最重要嘅一點係，表現活躍兼有兩球進帳嘅「東洋男神」武藤嘉紀，今戰續會夥拍連續兩仗有波入嘅「10號仔」尤路斯馬爾尼衝鋒陷陣，火力夠晒保證。更何況防中摩列斯感冒好番可以候命，中場丹尼拿迪沙仲話分析晒賀芬咸嘅致命弱點添。攻守兼備仲要做足功課，呢3分手到拿來啦！