皇馬C朗一個夠讓三球

猪拉多纳

今晚西甲頭場，皇家馬德里主場對CF格蘭納達，全世界都睇好C朗可以再演帽子戲法，打破魯爾入球紀錄，難怪莊家今場開出讓球主客和，皇馬要讓3球。其實以呢位葡萄牙巨星近期勇態，一人都唔只入3球啦，直取皇馬讓球主勝。

（now 632周六晚10時直播）

C朗已為皇馬各項賽事累積入321球，比魯爾少2球，所以佢今場只要再入3球，就可以成為「銀河艦隊」史上入波最多嘅球員。莊家開出皇馬讓3球，似乎有玄機。事實上，C朗近期弗到震，上輪西甲狂入5球，協皇馬大炒愛斯賓奴6蛋，上仗歐聯又省入3粒，贏薩克達4比0，以西甲魚腩CF格蘭納達嘅級數，更加冇能力抵擋C朗。
上季兩仗入格蘭納達13球

兩隊上季兩循環交鋒，皇馬共攻入CF格蘭納達13球，只失1球，包括主場狂數對手9比1，非常誇張，該仗C朗獨取5球，今場好大機會重溫好夢。雖然話加里夫巴利受傷缺陣，但仲有賓施馬幫助C朗，呢位法國前鋒已連續3場有波入，「B+C」組合要摧毀CF格蘭納達防線，絕對綽綽有餘。以皇馬近3場比賽，都淨贏4球或以上嘅走勢，讓球主客和「-3」博得過。