曼城炒黑貓出氣

猪拉多纳

新兵迪布尼孭到飛

曼城啱啱喺英超以1:2不敵韋斯咸，經歷兩連敗，今晚喺英格蘭聯賽盃第3圈作客新特蘭，肯定趁對手開季表現頹爆省多兩粒，一吐烏氣，「藍月亮」讓1球，2.15倍嘅「讓球客勝」抵玩！

（開賽時間：周三凌晨2:45）

曼城喺歐聯分組賽以1:2輸畀祖雲達斯之後，返到英超主場對韋斯咸，又以同樣比數再輸，英超「不敗金身」亦畀「錘仔幫」打破咗，谷埋成肚氣，今晚喺聯賽盃賽事對新特蘭，梗係想贏番場啦！
新特蘭聯賽不勝頹爆

雖然「藍月亮」中場指揮官大衞施華因腿傷關係，鬥新特蘭要繼續抖，射手阿古路狀態低迷又隨時畀領隊比歷連尼收起，由韋菲特邦尼或小將伊恩拿祖落場攻堅，不過曼城迷可以放心，新兵奇雲迪布尼上場表現勁「標青」，仲開齋取得「士哥」，加上有史達寧、耶耶托尼等星級戰將在陣，有力炒起實力低一班嘅「黑貓」。

同樣連輸兩場嘅新特蘭，今季除咗喺英聯盃以6:3贏乙組仔埃克塞特外，就冇贏過波，英超踢6場只得2和4負頹到爆。佢哋冇乜傷兵，但弊在成班波完全冇態，仲要愈踢愈差，撞正急需贏番場振士氣嘅曼城，真係輸少當贏！