戰狼訪紅魔 擸齊架生「大」駁火

猪拉多纳

朗尼撻着踩油爭士哥

曼聯今季全面回勇，啱啱喺上輪聯賽仲憑住曼城輸波失分，相隔超過860日之後重上英超榜首。更難得嘅係連王牌前鋒朗尼亦打破聯賽入球荒，令「紅魔」唔需要再單靠新兵安東尼馬迪爾攻堅。今晚佢哋喺歐聯B組主場迎戰進攻至上嘅禾夫斯堡，擺明會整場駁火大戰畀大家睇，1.8倍入球大唔係唔捧呀？

（有線61及201周四凌晨2:45直播）
紅魔連開7口入球大

「紅魔」喺歐聯分組賽首戰不敵燕豪芬，今仗回師主場肯定為咗3分全面搶攻。講火力，曼聯呢排堅靠得住，佢哋喺最近5場比賽入面，足足有4仗可以3次攻破對方大門，證明尹戈爾改造「紅魔」計劃已經踏入收成期。當中主力前鋒朗尼更喺上仗鬥新特蘭打破入球荒，肯定有助提升信心。再講，法國新兵安東尼馬迪爾表現勁搶眼，佢雖則年紀輕輕，不過速度同把握力兼備，今戰有力再做奇兵幫手數胡。睇埋近績嘅話，「紅魔」已經連續7場開出入球大，咁好路點可以唔追！
狼堡巴斯杜斯腳風順

「狼堡」今夏雖然冇咗奇雲迪布尼，不過佢哋中前場依然好手如雲，舒賀爾尼、達斯拿同樣射手得扭得，加上射手巴斯杜斯呢期腳風不俗，近3仗入3球，的確有駁火本錢。事實上「狼堡」一向有鋪鬥攻癮，即使作客亦唔會求守。呢班波出戰上屆歐霸盃，6場作客錄得5大1細，試過造訪拿玻里打和2:2，作客愛華頓慘敗1:4，睇得出佢哋鬥攻風格不變。

之不過「狼堡」防守演出飄忽，早前鬥拜仁失驚無神喺10分鐘內，被對方轟入5球夠晒驚嚇，上場主場鬥漢諾威亦唔能夠保住清白身，似乎經過拜仁一役後成班後防球員仲未可以重拾信心，呢次對住愈踢愈有嘅曼聯唔似守得住喎！