車仔頹爆點修科？

猪拉多纳

寸王第3季綜合症病發

「英超曼聯又輸一場」今季已經變咗「英超車路士又輸一場」，衞冕冠軍車仔踢咗7輪聯賽後，現時僅得8分排緊第14位，上場喺歐聯分組賽作客波圖又輸，真係好難想像呢隊波係由現今球壇最佳名帥莫連奴領軍。今晚車仔主場迎戰「聖人」修咸頓，又點可以唔捧對家呀？「聖人」受讓半一咁筍，捧下盤！

（now 621周日凌晨零時30分直播）
夏薩特法比仔缺態

「寸王」莫連奴一直有個「第3季綜合症」，睇番其執教歷史，通常都係上任第3季開始出事，第一次執教車仔嘅第3年同領軍皇家馬德里嘅第3季成績都好曳，睇嚟今次第二度「教車」，「寸王」都係擺脫唔到呢個魔咒。雖然車仔陣中僅得泰拔高圖爾斯一位傷兵，不過冇咗呢個門神，對球隊嘅影響已經夠晒大，雖然副選門將比高域實力都唔差，但佢極其量係一個好門將，未到門神級別，當球隊後防勁廢嘅時候，就要靠門神一啲神救嚟力挽狂瀾，保住不失，你哋睇吓曼聯嘅迪基亞就知啦！

莫連奴一向引以為傲嘅防守，今季喺車仔消失得無影無縱，右閘伊雲洛域同泰利老態盡現，葛特蘇馬又唔夠經驗，失波失得多連信心都冇埋。今場前線又有迪亞高哥斯達停賽，無論出雷米定法卡奧都靠唔住，入球能力大減，加上兩大中場核心夏薩特同法比加斯亦態沉，今場對住修咸頓其實真係冇乜爭勝本錢。
修咸頓受讓值捧

雖然修咸頓今季表現亦見回落，不過防守未衰到好似車仔咁，聯賽3場作客只係失咗2球咁大把，而且3場都保住不敗。其中新加盟嘅中堅華基爾雲迪積克上場對史雲斯仲入埋波，信心大增。

車仔上季雖然攞冠軍，但兩戰「聖人」都只能打和1比1，依家班波咁頹仲要讓波，「聖人」下盤捧得過呀！