阿積士燕豪芬大駁火

猪拉多纳

今晚係Super Sunday，歐洲聯賽大戰連場，阿謙都走嚟趁吓熱鬧，睇中咗荷甲嘅傳統大戰阿積士主場對燕豪芬。兩隊啱啱喺上周中嘅歐洲賽都贏唔到，返到聯賽面對傳統死敵，自然希望贏波吐烏氣，今仗勢必全力搶攻爭勝，阿謙估計今仗入波唔會少，一於捧有1.68倍嘅大盤。

（now 672周日晚8時30分直播）
安華艾加斯着火入7球

阿積士今季聯賽開鑼後表現理想，踢咗七輪攞到六勝一和佳績，年輕射手安華艾加斯入咗七球狀態甚勇，其餘前線球員域陀費斯查、米利克同尼曼查古迪積都有入波，可見阿積士嘅攻擊點甚多，令對手難以招架。阿積士上周中歐霸盃作客挪超莫迪雖以1比1逼和對手，但表現其實唔算太差，今仗回師開季至今未曾試過冇波入嘅主場出戰，雖有前鋒耶耶辛洛高因傷唔踢得，但一眾射手當弗唔怕冇波入。

燕豪芬開季表現平平，球隊現時只係排第四，落後榜首嘅阿積士5分，而且今季作客曾經失分畀海牙、海倫芬同荷華高斯等中型班，可見穩定性唔係咁好。燕豪芬今仗有前鋒盧克迪莊、祖斯蘇、中場古亞達度、守將積祖威廉斯同文奴高治因傷缺陣，今仗要贏波難度甚高。不過，燕豪芬近五仗作客有四場開大盤，加上代替盧克迪莊上陣嘅比利時前鋒尼斯甸尼喺上周中歐聯作客輸畀莫斯科中央陸軍一仗梅開二度，腳風甚順應該有力「安哥」，阿謙估計兩軍會上演入球騷，今仗一於捧大盤。