想爭冠軍非勝不可 磐田撼大宮坐和望贏

猪拉多纳

日乙今午爆發榜首大戰，「二哥」磐田山葉主場迎擊「一哥」大宮松鼠，呢場睇嚟有你冇我嘅對決，其實好可能和氣收場，平手盤博磐田坐和望贏。

推介磐田並唔因為佢哋往績佔優，過往主場11戰大宮攞到6勝2和3負，根本唔作得準，事關近幾季雙方互有勝負，根本處於均勢，磐田對住大宮話贏就贏嘅年代，已經係2007年之前嘅事。今次睇好佢哋，原因在於磐田唔只有中堅伊野波雅彥復出，中鋒保夫萊特亦重披戰袍，呢兩件傷兵踢得，攻防能力都得到強化，主場夠晒本錢同大宮搏命。

從積分形勢去講，帶頭嘅大宮有10分優勢，日乙剩低8輪賽事，磐田想爭冠軍嘅話，今場非贏不可，理論上會比對手踢得更進取。
松鼠社長振士氣 贏波個個有錢分

但係大宮都好重視今場波，除咗唔想畀磐田收窄積分差距，面子亦唔輸得，所以佢哋個社長木村稔早兩日宣布，今場只要贏到，全部31個甲隊註冊球員，個個都有贏波獎金，呢項德政對士氣鼓舞好大，家陣嘅大宮可以話上下一心，空前團結。

大家嘅士氣都咁旺盛，咁2倍入球大會唔會係最抵玩嘅彩池呢？咁又未必喎，磐田想贏，但就更怕輸，因為佢哋只係Head住第3位嘅大阪櫻花5分，今場輸親就可能保唔住前兩名直升日職嘅席位，所以攻得嚟會就住就住，入波想多都難，都係敲個平手盤磐田1.84倍「平手勝」好啲，至多咪走盤。