英格蘭大踢風流波

猪拉多纳

新紮4小強 盡砌愛沙尼亞

英格蘭反傳統，一改以往外圍賽飽食驚風散弱勢演出，今屆歐國盃外圍賽8戰全勝，輕鬆於E組提早出線，戰績堪稱近半世紀最佳。領隊鶴臣依家更加有「幸福煩惱」，為選出最佳人腳費煞思量，今晚主場鬥愛沙尼亞，試陣味甚濃。新崛起嘅「4小強」占美華迪、丹尼艾格斯、舒維爾同迪利阿里好大機會正選披甲，而佢哋亦會把握機會，爭取參與決賽周，呢班奇兵隨時帶來驚喜。

（有線61、201台周六凌晨2時45分直播）
線已出 鶴臣提拔新人

朗尼有傷、哈利卡尼缺態，至於史杜列治、韋碧克、佐敦軒達臣，韋舒亞等主力悉數因傷冇入選，令鶴臣更有大條道理考察一啲新人同邊緣國腳。

當中以李斯特城前鋒占美華迪，最令人期待，呢位28歲射手大器晚成，3年前仲喺非聯賽打滾，今季暫以7個入球高踞英超射手榜榜首，簡直係球迷奇遇記。占美華迪今年5月首次進身大國腳，但遲來先上岸，如可以保持勇態，話唔定可以搶埋哈利卡尼嘅正選位。23歲嘅丹尼艾格斯今季由般尼加盟利物浦，上仗英超打吡戰為紅軍建功，好有大賽球員風範。丹尼艾格斯雖然身材輸蝕，但勝在走位靈活，可為英軍鋒線帶來更多變化。
客軍未絕望 全力數胡

中場方面，成名於利物浦嘅舒維爾少年得志，可惜之後表現無以為繼，經過近兩年喺史雲斯磨練，已日漸成熟。呢位中場攻守兼備，難怪曾被睇好可成為謝拉特繼承人，上位指日可待。19歲熱刺新星迪利阿里今季表現愈見成熟，亦係英軍嘅未來希望。

對手愛沙尼亞仲有一線爭出線機會，肯定會盡最後努力豁出去一博。英格蘭二線兵要爭上位，當然亦會全力數胡，簡單啲要入球大。