3S今晚齊開餐!

猪拉多纳

爭出線撲殺魚腩

莫拉達孭重飛西班牙大炒格

足球世界弱肉強食，今晚歐國盃外圍賽，「3S」分途出擊，撲殺魚腩，炒鑊甘爭出線！西班牙（Spain）新紮射手艾華路莫拉達爆紅，要趁機盡數盧森堡，鞏固國家隊位置；瑞士（Switzerland）主場對8戰失27球嘅聖馬力諾，準備大開殺戒；至於瑞典（Sweden）已冇失分空間，作客列支敦士登，再唔強攻搶分，仲等幾時？
西班牙大炒格 莫拉達孭重飛

C組西班牙近年呈老化，好在効力祖雲達斯嘅艾華路莫拉達冒起，正好為鋒線人才凋零嘅「鬥牛兵團」帶嚟希望。呢位22歲新星今仗必趁迪亞高哥斯達缺陣博表現，搶奪主力位置，一於吼「主其他」波膽。

（有線62及202台周六凌晨2時45分直播）

西班牙今場贏波即可出線，對手只係世界排名142位嘅盧森堡，全取3分冇難度，問題係贏幾多球。今場雖有「迪哥」缺陣，但正好造就艾華路莫拉達，呢位祖記射手喺歐聯連續5場入波，追平名宿迪比亞路紀錄，認真犀利。
魯爾洛蘭迪混合體

西班牙傳媒指，莫拉達有齊魯爾嘅埋門觸覺、洛蘭迪嘅強壯，剛柔並濟。艾華路莫拉達作為國家隊新仔，亦需要交出功課，證明自己有料，最直接就係入波，唔會放過「魚腩」盧森堡。盧森堡8場外圍賽失19球，已肯定出局，首循環主場都吞西班牙4蛋。當時西班牙處於低潮都贏到4球，依家已恢復水準，送夠半打或以上光蛋畀盧森堡，都好合理。