奧地利「食花生」放水畀黑山

猪拉多纳

G組已經提早出線嘅奧地利作客黑山。黑山目前正同瑞典爭緊出線，相反奧地利就踢緊風流波，加上瑞典喺上屆世盃外正正壓倒奧地利出線決賽周，今次風水輪流轉下奧軍隨時「放水」畀黑山，務求整死瑞典報仇，阿謙睇好黑山可以喺主場贏波，平手盤抵玩。

（有線64及203台周六凌晨2時45分直播）
乘機踢走瑞典報仇

奧地利上輪作客4比1贏瑞典，首次透過外圍賽而殺入決賽周，佢哋最近6場作客贏晒，今仗理應繼續捧場，但阿謙就唔係咁睇。俄羅斯、瑞典同黑山正在爭奪呢組次名及第3名踢附加賽嘅資格，之前提過瑞典同奧地利嘅恩怨，奧地利今次隨時會「放水」畀黑山，務求逼死瑞典。

奧地利「放水」早有前科，82年世界盃決賽周分組賽對西德，就喺輸1球兩隊都可攜手出線情況下，開賽冇幾耐畀西德攻入1球後，兩隊「搓落磨」等完場，成功令同組阿爾及利亞黯然出局，所以今仗「嚟料」絕對唔奇。

黑山現時處境被動，球隊要贏晒餘下賽事先有機會，今仗照計冇保留。主將祖維迪今季轉投國米後表現回勇，加埋老將胡仙歷同踢緊中超FC北京嘅丹恩奴域，有望擊敗踢緊風流波嘅奧地利，平手盤捧得過。